ភ្នំពេញ៖ នាយករដ្ឋមន្ត្រីកម្ពុជា សម្ដេចតេជោ ហ៊ុន សែន បានបង្ហាញនូវរូបភាពសម្ដេចកិត្តិព្រឹទ្ធបណ្ឌិត ប៊ុន រា៉នី ហ៊ុនសែន ចំនួន៤សន្លឹក នៅថ្ងៃសៅរ៍ចុងសប្ដាហ៍នេះ ដោយអមជាមួយសំណេរបែបផ្អែមល្ហែមមួយថា «ប្តីសប្បាយចិត្ដដោយឃើញប្រពន្ធមានសុខភាពល្អ»។
រូបភាពទាំង៤សន្លឹកបានបង្ហាញនូវសម្ដេចកិត្តិព្រឹទ្ធបណ្ឌិតក្នុងទឹកមុខញញឹម ថតនៅកន្លែងមួយដែលមានទេសភាពស្រស់បំព្រង។
សម្ដេចតេជោបានសរសេរអមជាមួយរូបភាពនោះថា៖ «មើលមួយភ្លេតមិនស្គាល់ថាជាអ្នកណា? ពេលពិនិត្យមើលយូរទើបដឹងថាជាភរិយាខ្ញុំសោះ។ ចៅ២២នាក់ហើយលោកយាយប្រពន្ធ។ ប្តីសប្បាយចិត្ដដោយឃើញប្រពន្ធមានសុខភាពល្អ»។
សម្តេចតេជោ និងសម្តេចកិត្តិព្រឹទ្ធបណ្ឌិត បានរៀបអាពាហ៍ពិពាហ៍នៅថ្ងៃទី៥ មករា ឆ្នាំ ១៩៧៦ ក្នុងជំនាន់អតីតរបបកម្ពុជាប្រជាធិបតេយ្យខ្មែរក្រហម រហូតមកដល់ពេលនេះគឺមានរយៈពេល៤៥ឆ្នាំហើយ។
ទោះជាយ៉ាងណាក្ដីស្រលាញ់រវាងសម្ដេចទាំងពីរគឺនៅតែមានដូចដើម។ ជារឿយៗសម្ដេចតេជោ តែងតែបង្ហាញក្ដីស្រលាញ់របស់សម្ដេចចំពោះសម្ដេចកិត្តិព្រឹទ្ធិបណ្ឌិតនៅលើហ្វេសបុករបស់សម្ដេចផ្ទាល់ និងបានសរសេរសៀវភៅពីជីវិតស្នេហារបស់សម្ដេចដែលមានចំណងជើងថា «គូរព្រេងមិនព្រាត់» ដើម្បីជាការចងចាំនូវការតស៊ូនិងលះបង់ចំពោះស្នេហាមួយនេះផងដែរ៕
